سخن ضیائے طیبہ اداریہ خاموش پابندی ۔۔۔! ظلم رہے اور امن بھی ہو کیا ممکن ہے تم ہی کہو کتنی حیرت کی بات ہے۔۔۔ تعجب کی بات ہے۔۔۔ اور اس سے بھی بڑھ کر کہ اس حیرت و تعجب والی باتوں کی ہمیں اب عادت سی ہوگئی ہے۔۔ ۔ہم اپنے اوپر ہونے والے مظالم پر بھی خاموش ہیں اور ان مظالم پر عائد پابندی پر بھی خاموش ہیں۔۔۔ ہم پر اغیار کریں حملہ۔۔۔تو ہم خاموش۔۔۔ ہمارے اپنے کریں حملہ ۔۔۔ تو بھی ہم خاموش۔۔۔ حملہ آوروں کو ’’ایکسپوز‘‘ کرنے پر پابندی۔۔۔اور اُن کا ہمارے بیچ بیٹھنے اٹھنے پر خاموشی۔۔۔ ہمارے لکھنے پر پابندی۔۔۔ ہماری کتابوں پر پابندی۔۔۔ اور ہم پر لکھنے والوں کے بےباک قلم پر پابندی۔۔۔ ہمارے بولنے پر پابندی۔۔۔ہم پر بولنے پر پابندی۔۔۔ اور ہمارے سمجھانے پر پابندی۔۔۔ ہمارے پاور فل جلسوں کی کوریج پر پابندی۔۔۔ ہمارے پر امن احتجاج پر پابندی۔۔۔ ’’معمولی کھلاڑی معمولی کھیل‘‘ کھیلنے شہر آئیں تو ۔۔۔ ’’خصوصی‘‘ راستوں پر پابندی۔۔۔ ہمارے بڑوں کے دن آئیں تو۔۔۔ڈبل سواری پر پابندی۔۔۔اور ہمارے تہوار ہوں تو ۔۔۔ موبائل پر پابندی۔۔۔ ہمارے ’’نظریاتی‘‘ علما کے ’’اسکرین ‘‘پر آنے پر پابندی۔۔۔ ان سب پابندیوں پر میڈیا کی خاموشی۔۔۔ خاموشی سے سوشل میڈیا بلاک۔۔۔ حکومتِ وقت کی خاموشی۔۔۔ بااختیار اداروں کی خاموشی۔۔۔ خطبا و علماکی خاموشی۔۔۔ کالم نگاروں کی خاموشی۔۔۔ یاد رہے۔۔۔! یہاں ’’ہم‘‘سے مراد ’’پاکستانی‘‘ لیجیے گا۔۔۔ ’’مسلمان‘‘ نہیں۔۔۔ ورنہ ہمارے اس شمارے پربھی خاموشی سے لگ جائے گی پابندی۔۔۔جب کہ۔۔۔ اس میں کوئی شک نہیں کہ ایک پاکستانی بھی ان سب پابندیوں کو خاموشی سے عادت بنائے سہہ رہا ہے۔۔۔ قارئین محترم۔۔۔! خاموشی اور پابندی کے باوجود۔۔۔ ایک کام ہم بڑے شوق سے۔۔۔جذبے سے۔۔۔ دھڑلے سے۔۔۔ جہاد سمجھتے ہوئے۔۔۔ کرتے آئے ہیں۔۔۔ اور بروقت و برجستہ کرتے رہتے ہیں۔۔۔ وہ ہےصرف ۔۔۔مذمّت۔۔۔مذمّت ۔۔۔ مذمّت۔۔۔ یہ وہ واحد لفظ ہے کہ جس کے اظہار پر کبھی بھی ’’ہم‘‘خاموش نہیں رہتے۔۔۔ اور نہ ہی کبھی اس لفظ کی تشہیر و پرچار میں پابندی لگائی جاتی ہے ۔۔۔ البتہ یہاں خاموش پابندی کی پروا کیے بغیر مجھے اپنے آپ پر بالخصوص ۔۔۔اور’’ہم‘‘ پر افسوس ہے۔۔۔ سیّد محمد مبشر قادری ڈائریکٹر : اسکالرز انسائکلوپیڈیا پروجیکٹ خادم: انجمن ضیائے طیبہ